Klup di kriadonan di para di Kòrsou "De Vogelvriend" ta eksistí mas di 60 aña. Pa ta eksakto dia 27 di mei di aña 1955, un grupo di hulandes ku tabata traha e tempu ei na Kòrsou, a lanta e klup di kriadonan di para'ki. E promé presidente tabata e hulandes europeo Jan Wardekker (dfm) ku a guia e klup pa basta aña. Ela bai den historia komo e persona ku mas largu a sinta komo presidente di "De Vogelvriend". Si den kuminsamentu, miembronan di e klup tabata hulandesnan europeo, poko poko kurasoleñonan, ku tabata tin kriamentu di para komo nan hòbi, a kuminsa bira miembro di "De Vogelvriend".  Ta te na aña 1982 numa, "De Vogelvriend" a haña su promé presidente kurasoleño. Otro miembronan ku a yega di okupá e puesto di presidente ta Osric Curiel, Edison Bloem, Eligio Kleimoedig i Murray Joubert. Den pasado resien, Stanley Ignacio i Didier Becker tambe a yega di okupá e puesto di presidente di "De Vogelvriend". Kada tantu tempu pasa  "De Vogelvriend" sa tene eksposishonan di para, kaminda miembronan ta haña e oportunidat pa mustra na e públiko bishitante e mihó paranan di nan kolekshon. Na un eksposishon asina bo por mira diferente sorto di Prikichi por ehèmpel di e famia Aratinga, di e famia Pyrrhura, di e famia Agaporniden i diferente otro sorto di para, manera grasparkiet. Bo ta mira pues mas di e loke ku nan ta ama  "Kromsnavels". Aktualmente tin masha poko kriadó di para chikí, e loke ku nos ta denominá komo Tropisch". Paranan manera Kanari, zebravink, Spitsstaartamandine, Napoleontjes, Blauw fazantjes, Binsen astrildes masha poko bo ta mira. Pa tene nan kolekshon di para na nivel i pa por tin kontinuamente sanger fresku, miembronan di "De Vogelvriend" regularmente ta pidi òf ta kumpra para prinsipalmente for di Hulanda, kaminda tin miles di kriadó ku un enorme variedat di para. Tambe miembronan sa pidi para for di Surnam i de bes en kuando nan sa bestèl para for di Cuba. E posibilidat pa e kriadó lokal bende su paranan, paranan ke ela brui ku eksterior, ta masha limitá. Kompanianan aereo no ta transportá para di Kòrsou pa Oropa, kaminda tin hopi kriadó ku ta interesá den por ehèmpel nos Prikichi, esta e Prikichi di Kòrsou i tambe interesá den otro sortonan di Sur-Amerika, ku miembronan di "De Vogelvriend" ta brui ku éksito. Esaki sigur ta un estorbo. Tur hende, ku tin kriamentu di para komo nan hòbi, por bira miembro di "De Vogelvriend".  Miembronan di "De Vogelvriend" ta reuní tur promé djamars di luna na "Klup Tamarijn" na Mahaai. Aktualmente "De Vogelvriend" tin mas o menos 80 miembro, di kua un 40 asina ta aktivo. Si bo tin interes den kriamentu di para, no duda........... djoin !!!!!